Алматыда түнде қар жауды. Қаланың Тұрғын үй саясаты басқармасында жауын-шашынның салдары айтылды, деп хабарлайды zakon.kz.
21 қазан күні сағат 22:00-де Алматыда жаңбыр жауа бастады, ол 22 қазан күні сағат 2:00-де қарға ұласты, - делінген хабарламада.
Тау бөктеріндегі аудандарда 10 см, таулы жерлерде 16 см қар жауды.
Қар тазалау үшін қала жолдарына 537 техника, оның ішінде 117 құм шашқыш және 1073 жол жұмысшысы шықты.
Тау бөктері мен таулы аудандарда көктайғаққа қарсы материалдар себіліп, қар сыпырылады, – деп толықтырды баспасөз қызметі.
Қалада жабысқақ дымқыл қардың салмағына шыдамай сынған бұтақтарды тазарту жұмыстары жалғасуда.
"Қазгидромет" болжамы бойынша, 23 қазанға қараған түннің бірінші жартысына дейін жауын-шашын жауады.
Күндіз 22 қазан +2+4 градус, түнде-1-3. Ертең күндіз +8+10 градус жылы болады.
Бақытжан Отарбаева
