Эстафета үш олимпиадалық кластердегі 12 кезеңнен тұрады. Алауды алып жүруге 14 пен 86 жас аралығындағы жалпы есебі 1200 алау ұстаушы қатысады. Сонымен қатар тарихта алғаш рет алауды адамдар ғана емес, машиналар да алып жүрмек. Салтанатты рәсім Бейжіңнің солтүстігіндегі Олимпиадалық саябақта өтті.
Эстафетаға Қытай азаматтары ғана емес, 20-дан астам ел мен аймақтардан келген шетелдіктер, тіпті роботтар да қатысады.
Пандемияға байланысты эстафетаның бағыты мен ұзақтығы біраз қысқарды. Коронавирус инфекциясының алдын алу мақсатында эстафетаға көрермен қатыспайды. Сонымен бірге алауды адамдар тұратын көшелер мен аудандардан алыс жерлерде алып жүру қарастырылған. Олимпиада алауы Қытай Халық Республикасына былтыр 20 қазанда жеткізілген.
Бейжің — 2008 жылғы жазғы және 2022 жылғы қысқы Олимпиада алауын қабылдаған тарихтағы алғашқы қала.
Олимпиада алауының эстафетасы — Олимпиадалық ойындардың маңызды символы. Ол ойындардың басталуын және бейбітшілік пен достықтың маңызын білдіреді. Сонымен қатар Олимпиада ойындарының негізгі тұжырымдамаларын еске салу қызметін атқарады.