"Астана балет" театрында өткен салтанатты іс-шараға ҚР Мәдениет және спорт министрі Асхат Оралов, Халықаралық шахмат федерациясының президенті Аркадий Дворкович, 14-әлем чемпионы Борис Крамник, 15-әлем чемпионы Вишванатан Ананд, әйелдер арасында 4 дүркін әлем чемпионы Хоу Ифань және биыл чемпион атанудан үмітті Ян Непомнящий, Дин Лижэн қатысты.
Асхат Оралов Мемлекет басшысы Қасым-Жомарт Тоқаевтың құттықтау хатын оқып берді. Осыдан кейін Аркадий Дворкович чемпионатты ашық деп жариялады.
Ал Қазақстан шахмат федерациясының президенті Тимур Турлов өз сөзінде Астана шахматтан 17-әлем чемпионы анықталатын қала болатынын атап өтті.
Кештің шарықтау шегі жеребе тарту рәсімі болды. Нәтижесінде Ян Непомнящий бірінші партияны ақ тастармен бастайды. Қарсыласы Дин Лижэнге қара тастар бұйырды.
Айта кетейік, бүгін әлем чемпионаты өтіп келе жатқан 137 жылдың ішінде жеребе тарту алғаш мәрте роботтың көмегімен жүргізілді.
Бұл сынақ сәтті өтіп, көптің көңілінен шықса, тұрақты қолданылмақ. Жалпы классикалық әлем чемпионатының жүлде қоры 2 миллион еуро. Жеңімпаз осы сыйақының 60%-ын алса, қалғаны финалиске беріледі.
