Шымкентте мәдениет күндері аясында Тәжікстанның өнімдері көрмеге қойылды
Сурет: Шымкент қаласы әкімдігінің баспасөз қызметі
Тәжікстан Республикасының мәдениет күндері Шымкенттегі "Көрме" орталығында ауқымды іс-шарамен басталды, деп хабарлайды қалалық әкімдіктің баспасөз қызметі.
Көрмеге Тәжікстан Республикасының ауыл шаруашылығы министрі Хакимзада Құрбан және қала әкімі Мұрат Әйтенов кәсіпкерлердің өнімдерімен, тәжік халқының мәдениеті және дәстүрімен танысты.
Сурет: Шымкент қаласы әкімдігінің баспасөз қызметі
"Баршаңызды екі ел арасында дипломатиялық байланыстардың орнағанына 30 жыл толуымен құттықтай отырып, қазақ елінің қонақжайлылығына ерекше алғысымды білдіремін. Біздің елдің сауда-экономикалық серіктестері арасында Қазақстанның маңызы зор. Мұнда елімізден ауыл шаруашылығы өнімдері көптеп экспортталады. Қала тұрғындары мен қонақтары осы үш күн мерекеде Тәжік елінің мәдениеті, ұлттық тағамдарымен, өнерпаздарымен таныса алады. Біздің ұқсастықтарымыз көп. Екі елдің достығы арта берсін", — деді Хакимзада Құрбан.
Ал Қажымұқан стадионында ұйымдастырылған жәрмеңкеге тәжік кәсіпкерлерінің ауыл шаруашылығы өнімдері мен өнеркәсіп тауарлары ұсынылды. Жәрмеңкеге 189 тонна анар, алмұрт пен алма, 46 тонна кептірілген жеміс, 85 тонна бақша өнімдері – қауын, қарбыз,асқабақ, 248 тонна көкөніс, 8 тонна бал және 13 тонна өнеркәсіптік тауарлар әкелінген.
Сурет: Шымкент қаласы әкімдігінің баспасөз қызметі
Газдалған, газдалмаған және энергетикалық сусындар, шырындар, консервіленген жемістер мен көкөністер, кондитерлік өнімдер де бар.
Қала тұрғындары орталық стадионға көптеп жиналып, Тәжікстанның ұлттық тағамдарымен танысып, дәм татып, тәжік халқының өнерпаздарының концерттік бағдарламасын тамашалады.
Сурет: Шымкент қаласы әкімдігінің баспасөз қызметі
Айта кетейік, Орта Азиядағы маңызды сауда-экономикалық серіктесіміз Тәжікстанмен алыс-беріс жыл сайын артып келеді. Былтыр екіжақты тауар айналымы 20 пайызға өсіп 1,4 миллиард долларға жеткен.
Сурет: Шымкент қаласы әкімдігінің баспасөз қызметі
