Магистратураға түсушілер түрлі қулыққа барған: 153 адамның тест нәтижесі жойылды

20 шілдеден бері 20 мыңға жуық тест тапсырушы кешенді тестілеуден (КТ) өтті. Бір апта ішінде ереже бұзғаны үшін 153 тест нәтижесі жойылды. Бұл туралы Ұлттық тестілеу орталығының директоры Руслан Емелбаев айтты, деп хабарлайды Zakon.kz.

Кешенді тестілеу – ақпараттық-коммуникациялық технологияларды пайдалана отырып, бірнеше оқу пәндері бойынша бір уақытта өткізілетін емтихан түрі. КТ жоғары оқу орындарының білім беру бағдарламаларын меңгерген тұлғалар үшін жүргізіледі.

Тестілеу басталған кезде тыйым салынған заттарды алып жүруге әрекеттенген 153 талапкердің 89 тестілеу нәтижесі жойылды. Емтихан кезінде ереже бұзғаны үшін 61 талапкер, бейнероликтерді қайта тексеру нәтижесінде 3 адам шеттетілді.

Тестілеу кезінде бұл үш талапкер смартфон пайдаланып, тестті фотоға түсіріп, емтихан материалдарын басқаларға жіберген. Тестілеушілердің сертификаты жойылды, тест сұрақтары базадан алынып тасталды. Барлық видео тексеріледі.Ұлттық тестілеу орталығының директоры Руслан Емелбаев

FACE-ID жүйесінің арқасында тестілеуге кіре берісте басқа адамдар үшін тест тапсырмақ болған төрт тұлға анықталды. Олар туралы ақпарат уәкілетті органға жолданды. Айтпақшы, былтыр тестілеуден өтетін адам орнына бір ғана адам кірген еді.

Кешенді тестілеуге тіркелу кезінде тестілеушілерден ережелермен толық танысып, келісімін көрсету ұсынылады. Соған қарамастан олардың кейбіреулері түрлі қулыққа барып, заң бұзушылықпен сынақтан өтуге тырысады. Сондықтан мен болашақ магистранттарды ережені бұзбауға және академиялық адалдық қағидаттарын сақтауға шақырамын.Руслан Емелбаев