Спорт жаңалықтары 
Депутат бұралқы иттер жайлы: жануарлар құқығы адам құқығынан жоғары болғаны ма
Фото: pexels
Мәселені депутат Еділ Жаңбыршин көтерді.
Ол Маңғыстау өңіріндегі 16 жастағы баланың итке таланып, ауыр жағдайда ауруханаға түскен оқиғасын айта отырып, бір жайттың өзі қоғамдағы бірнеше проблеманың бетін ашып бергендігін айтты.
"Біріншіден, итке таланған баланың жасы 16-да екенін ескеру керек. Оның орнында 3-4 жастағы бүлдіршін болса, жағдайының қандай болатынын елестету қиын. Екіншіден, бұл – ақпарат құралдарында жазылып, резонанс тудырған оқиға. Соған орай, облыстық ауруханада итке таланған балаға қажетті ем-шараның бәрі жасалынды. Бірақ, ауылдарда ит талаған баланың бәріне дұрыс медициналық көмек дер кезінде жасалып жатыр ма, әрине жоқ! Үшіншіден, дене жарақаты жазылар, ал баланың психикасына келтірілген зақым мен оның салдарын кім ойлайды?! Бұл дерт өмір бойы адамның тағыдырына кері әсер етпей ме?",- деді ол.
Бұған қоса, Жаңбыршин жануарлар құқығын қорғаушы кейбір ұйымдардың жұмысын сынға алды.
"Бұралқы иттер туралы сөз болса, жануарлар құқығын қорғаушы кейбір ұйымдар өре тұрады. Түсінеміз, олар ЮСАИД сияқты батыстық ұйымдардан алған гранттарының ақшасын ақтауы керек болар. Бірақ, жануарлар құқығы Адам құқығынан жоғары болғаны ма?!...Осыдан 20 жыл бұрын Алматы облысы, Талғар қаласында бес жасында ит талағаннан кейін тілі сақауланып невралгия ауруына шалдыққан кішкентай баланың тағдығырын білетін боларсыз. Оның ата-анасы қызын емдету үшін қанша уақыт, қанша қажыр, қанша қаражат жұмсады – оны кім есептеді, кім компенсация төледі? Ешкім. Мұндай оқиғалар ел ішінде көп. Осындай оқиғаларды әлгі шетелден гранталғыш ұйымдар неге көтермейді? Неге зерттемейді?". Еділ Жаңбыршин
Оның айтуынша, елімізде жыл сайын 38 мыңнан астам адамды иттер қабады. Бұл күндік есеппен шамамен 104 адам. Ал оның кемінде жартысы – 14 жасқа дейінгі балалар.
Ол бұралқы иттердің мәселесін қоғамда жүйелі түрде шешу үшін, Үкіметке келесі мәселелерді қолға алуды ұсынды:
- Бірінші, өздерін «зооқорғаушылармыз» деп тіркелген барлық ұйымдардың қандай көздерден және қандай мақсатта қаржы алғанын тексеру қажет;
- Екінші, Азаматтарды, Парламент депутаттары мен мемлекеттік қызметкерлерді әлеуметтік желілер мен БАҚ-да балағаттап, қаралау, жала жабу фактілерін зерттеп және зерделеп, оларды ұйымдастырып отырған тұлғаларды анықтап, олардың іс-қимылына құқықтық баға берілуі тиіс;
- Үшінші, қолданыстағы заңның аясында жаппай көшедегі бұралқы иттерді ұстап, қамау шараларын алсын, агрессия көрсеткендерін және жұқпалы аурумен ауратындарын эвтаназия жасау мүмкіндіктерін қарастырсын.
Қорытындылай келе, Жаңбыршин бірнеше Мәжіліс депутаттары болып, осы мәселені реттеу үшін заң жобасын әзірлеп, Парламентте талқылап жатқандарын айтты.
Еске салсақ, Zakon.kz тілшісі аймақтардағы бұралқы иттердің әлегі жайлы материал жариялаған болатын. Сілтемеге өту арқылы оқи аласыз.
