Алматы облысының оқушыларына жол қауіпсіздігі шаралары түсіндірілді

Алматы облысының тәртіп сақшылары Жол-көлік апатының құрбандарын еске алудың Дүниежүзілік күніне орай Іле ауданындағы 48 мектеп қабырғасында балалар мен ата-аналардың жиналысын өткізіп, жол жүру ережесі мен оның маңыздылығы туралы айтып берді. Іс-шара шамамен 37 мыңнан астам баланы қамтыды. Жиналыс барысында қатысушыларға жол жүру ережесі жазылған ақпараттық материалдар таратылды. Бұл туралы Алматы облысы Полиция департаментінің баспасөз қызметі хабарлады.

«Жол қауіпсіздігі апталығы» аясында Байсерке ауылының №12 мектебінің оқушыларымен «Жүргізуші, менің өмірімді сақта!» атты флешмоб өткіздік. Сонымен қатар, Өтеген батыр кентінде №7, №13 және №38 мектеп-гимназияларындағы кадет сыныбының тәлім алушыларымен «Сіздің жолаушыңыз - бала» акциясын өткізіп, жол жүру кезінде балаларға ерекше назар аудару қажеттілігін түсіндірдік. Өзге мектептерде осы тақырыпта ашық сабақтар, дөңгелек үстелдер, кездесулер және т.б. іс-шаралар ұйымдастырылды», - деп атап өтті Іле ауданы Полиция басқармасының Ювеналды полиция тобының аға инспекторы полиция майоры Геннадий Нечаев.

Естеріңізге сала кетсек, полиция өкілдері таратқан ақпаратта биыл Алматы облысында жол-көлік апатынан 300-ден аса адам ажал құшып, оның 94-і қозғалыс жылдамдығын асыру салдарынан көз жұмғаны туралы жазғанбыз. Сондай-ақ, 77 жаяу жүргінші жол жүру ережесін сақтамаудың кесірінен қайтыс болса, оның 18-і кәмілетке толмаған жеткіншектер болған.