Димаштың арқасында Ақтөбеде туризм қарқынды дамып келеді
Хабар 24
Ақтөбе облысында Қарғалы су қоймасында туристік аймақ салу жоспарланып отыр, деп хабарлайды "Хабар-24".
Бұл аумақ саланы дамытуға арналған мемлекеттік бағдарлама аясындағы өңірлік маңызы бар елдегі 50 нысанның қатарына кіреді. Жалпы облыстың ішкі туризмін дамыту мақсатында жыл сайын 10 млн теңге бөлінеді. Былтырдан бері тарихи-мәдени нысандарды қамтитын бағыттар жасақталып, алты ауданда меймандарды күтетін қонақжайлар пайда болды.
"Бұдан бөлек, әйгілі әнші Димаш атындағы турбағыт құрылып, оның өнеріне тәнті болған Еуропа мен Азия елдерінің азаматтары да келіп тұрады. Өңірдің туристік картасы да жасақталған. Оның аясында меймандар қайда барғысы келетіні туралы өтініштерін қалдыра алады. Әрі қарай туроператорлар қызмет көрсетуге дайын. Биылғы жарты жылдықтың қорытындысы бойынша аймаққа келуші туристердің саны 13 процентке өскен", - дейді телеарна тілшісі.
Әуез Арызғұлов, облыстық кәсіпкерлік басқармасы туризм бөлімінің бас маманы:
– Көбінесе туристер баратын орындардың бірі – Қобыланды батыр мемориалдық кешені, Абат-байтақ кесенесі, Есет батыр кесенесі. Оларға жылына 25 мыңдай адам барады. Туристерге қолайлы жағдай жасау үшін облыс аудандарында қонақ үйлер ашылған болатын. Олар аталған тарихи-мәдени объектілерінің жанында құрылған.
