Алматыда біртүрлі көліктің иесі іздестіріліп жатыр
newtimes.kz
Алматыда артқы бамперінде от жанып, төбесіндегі мұржадан түтін будақтап жүрген біртүрлі көліктің иесін полиция іздестіріп жатыр. Полиция бұл арада көлік құралын пайдалану ережесі бұзылғанын айтады, деп хабарлайды Zakon.kz inAlmaty.kz-ке сілтеме жасап.
Әлеуметтік желілерде біртүрлі көліктің видеосы жарияланды. Артқы бамперде от жағатын пеші, ал төбесінде түтін шығаратын мұржасы мен желдеткіші бар. Ол не үшін олай жасалғаны, белгісіз. Кейбір желі қолданушылары бұл машинада барбекю пісіру үшін жасалған болуы мүмкін деп топшыласа, тағы бірі бұл көлік, мүмкін бензин емес, көмірмен жүретін шығар деп болжайды. Біреу "Есерсоқ Макс" фильміндегі автомобильге ұқсатып жасаған болуы мүмкін деп өз ойын айтты.
Алматы полициясы ерекше көліктің жүргізушісін іздестіріп жатқандарын айтты.
- Жүргізуші көлік құралын пайдалану ережелерін анық бұзған. Болашақта оның іс-әрекетіне құқықтық баға берілетін болады, деп хабарлады Алматы қаласындағы ПД баспасөз қызметі.
