Елордада мешітке садақа қабылдайтын терминал орнатылды

Елордада "Әлжан ана" мешітінде азаматтардың қайырымдылығын қабылдауға арналған электрондық терминал пайда болды, деп хабарлайды zakon.kz.

Бұл туралы осы игі шараның тұсау кесу рәсіміне қатысқан ҚР Ақпарат және қоғамдық даму министрі Дәурен Абаев Facebook-тегі парақшасында жазды.

"Өздеріңізге мәлім, қазан айында өткен ІІІ республикалық имамдар форумында ҚМДБ қаржы қызметінің ашықтығын қамтамасыз ету жөнінде мәселе көтерген болатынмын. Бұл бағытта Министрлік тарапынан Діни басқармамен бірлесіп нақты жұмыстар жасалып, бүгінде Нұр-Сұлтан қаласының барлық 12 мешітінде осындай терминалдар орнатылды.

Азаматтарды алдағы уақытта қайырымдылық қаражатын мешіттердегі арнайы терминалдар арқылы енгізуге шақырамын. Аталған бастама Алматы, Шымкент қалаларының мешіттерінде, кейіннен барлық облыс орталықтарында жалғасады.

Бұл жаңалықты қосымша қиындық деп емес, ашықтыққа, дамуға жасалған маңызды қадам деп түсінген жөн. Имамдарымыз келушілерге терминалдар туралы түсіндіріп, мешіт әкімшілігі терминалды пайдалану бойынша көмек көрсететін болады" делінеді жазбада.