"Ақтөбе" хоккей клубының ойыншылары қар құрсауынан құтқарылды
ГТРК "Южный Урал"
18 бен 37 жас аралығындағы 28 спортшы отандық жоғарғы лига чемпионатының екінші кезеңі үшін Ақтөбеден Петропавлға жолға шыққан. Спортшылармен қатар автобуста 2 жаттықтырушы мен 2 жүргізуші болған, деп хабарлайды zakon.kz "ҚазАвтоЖол" ҰК" АҚ баспасөз қызметіне сілтеме жасап.
Автобус қалың қарға төтеп бере алмай, Тимирязево-Сарыкөл-Солтүстік Қазақстан облысының шекарасы автожолының 27-шақырымында тоқтап қалда. Жүргізуші жолдардағы қозғалысқа шектеу қойылғанға дейін жолға шыққан.
Естеріңізге салсақ, аталмыш жол учаскесі 5-қаңтар күні сағат 18:30-да ауа-райының қолайсыздығына байланысты уақытша жабық болған. Сол күні таңғы алтыда жолға шыққан жүргізуші 1000 шақырымға жуық жолды жүріп өткен. Автобусты қардан шығару үшін автогрейдер мен бульдозер іспеттес арнайы техника жұмылдырылды.
Жолда қалған спортшылар үшін Тимирязев ауданының әкімі түскі ас ұйымдастырды. "Ақтөбе" мен "Қызылжар" хоккей клубтары арасындағы ойын 7-қаңтар күні Петропавл қаласындағы Александр Винокуров атындағы спорт сарайында өтеді.
Қазіргі уақытта республикалық маңызы бар автожолдарда 653 бірлік техника жұмыс істеуде.
"ҚазАвтоЖол" ҰК" АҚ жүргізушілерге жол ережесін сақтау, рұқсат етілген жылдамдықты асырмау, қауіпсіз қашықтықты сақтау қажеттілігі туралы ескертеді. Сонымен қатар, сапарға тек қысқы дөңгелектермен шығуға кеңес береді.
