Төтенше жағдай кезінде кәсіп ашқысы келетіндердің өтініштері қарала ма

Өз кәсібін дөңгелетуге ниетті азаматтардың өтініштері төтенше жағдай кезінде де қаралады. Бұл туралы "Даму" КДҚ" АҚ мемлекеттік органдармен өзара әрекет ету департаментінің директоры Гүлсая Зейнелғабдина ОКҚ брифингтінде мәлімдеді, деп хабарлайды "Хабар-24".

Ол төтенше жағдай кезінде де жас кәсіпкерлер өз өтініштерін жіберуіне болатынын айтып өтті.

"Бізде жас кәсіпкерлікке арналған бағдарламалар бар. Төтенше жағдай кезінде де жұмысын жалғастырып жатыр. Жас кәсіпкерлер үшін "Еңбек" бағдарламасы бар. Ол арқылы кәсіпкерлер 6 пайызбен несие ала алады. Заим құны 6,5 МРП-мен 8 МРП аралығын құрайды. Заим мерзімі – 5 жыл", - деді.

Сондай-ақ "Бизнестің жол картасы 2025" бағдарламасы туралы айтып өтті.

"Бұл бағдарламаның аясында жас кәсіпкерлерге де қолдау көрсетеміз. Бұл бағдарлама бойынша жас кәсіпкер бірінші бағыт бойынша несие ала алады. Егер ауылда немесе моноқалаларда кәсібін жүзеге асыратын болса, 750 млн теңгеге дейін, қалада жүзеге асыратын болса, 7 млрд теңгеге дейін несие беріледі", - деді "Даму" КДҚ" АҚ мемлекеттік органдармен өзара әрекет ету департаментінің директоры.