Павлодар облысында жол апатынан мотоцикл жолаушысы қаза тапты

Павлодар облысында жол апатынан мотоцикл жолаушысы қаза тапты, деп хабарлайды Zakon.kz.

Оқиға 28 қазан күні сағат 17.15-те Шарбақты ауданы Хмельницкое ауылының маңындағы дала алқабында болды.

"Иж" мотоциклінің 35 жастағы жүргізушісі рульді басқара алмай, аударылып кеткен, нәтижесінде 46 жастағы жолаушы алған жарақатынан оқиға орнында көз жұмды, – деп хабарлады Павлодар облысы Полиция департаментінің баспасөз қызметі.

Полиция мотоциклді айып тұрағына қамады. Апат фактісі бойынша тексеру жүргізілуде, – деп қорытындылады ведомствода.

Жыл басынан бері Павлодар облысы аумағындағы 451 жол-көлік оқиғасы орын алды. Жол апатынан 38 адам қаза тауып, 676 адам жарақат алды.

Бақытжан Отарбаева