Ведомствоаралық комиссия «Сары» аймаққа өткен жағдайда енгізілетін шараларды қабылдады
Сурет: Zakon.kz/Павел Михеев
Денсаулық сақтау министрі Ажар Ғиният маусым айының ортасынан бері елде коронавирус инфекциясын жұқтыру көрсеткіші өскенін мәлімдеді.
Хабарламада өткен аптамен салыстырғанда коронавирус жұқтыру 2,9 есеге артқаны және 6 ай бұрын вакцинацияланғандар мен мүлдем вакцина салдырмағандардың 80%-ына дейін жұқтырғаны айтылады.
Елімізде COVID-19 вирусын жұқтыру өсуін ескере отырып, Қазақстанда коронавирус инфекциясының таралуының алдын алу жөніндегі ведомствоаралық комиссия облыс эпидемиологиялық қауіптің «сары» аймағына өткен жағдайда қосымша шаралар қабылдау туралы шешім қабылдады:
науқаспен жақын байланыста болған адамдарды қашықтан жұмысқа ауыстыру;
COVID-19 вакцинациясына абсолютті қарсы көрсеткіштері бар қызметкерлерді және жүкті әйелдерді онлайн жұмысқа ауыстыру;
жабық мекемелерде, қоғамдық көліктерде міндетті түрде маска тағу;
10 адамнан асатын жиындарды онлайн форматқа көшіру ұсынылады.
Сонымен қатар эпидемиологиялық қауіпті аймаққа қарамастан әуеде, теміржол көлігінде, халықаралық автобустарда маска тағу ұсынылады.
Жиын соңында Тоғжанов өңір басшыларына коронавирус инфекциясына қарсы екпе науқанын күшейтуді, вирус жұқтырғандар саны көбейген жағдайда қажет кадрлармен, дәрі-дәрмекпен және төсек-орынмен қамтамасыз етуді ерекше бақылауға алуды тапсырды.
Сонымен қатар халық арасында түсіндіру жұмысын сапалы жүргізу қажет.
Еске салайық, өткен тәулікте (30 маусым) коронавирус инфекциясының 189 жаңа жағдайы тіркелді. Аурудың өсуі негізінен Алматы және Нұр-Сұлтанда байқалды.
Бұған дейін Денсаулық сақтау вице-министрі – ҚР бас санитарлық дәрігері Айжан Есмағамбетова «сары» аймақ ешқандай шектеу енгізуге негіз емес екенін айтқан еді.
