Президент үкімет пен әкімдікке Абай облысының оқу орындарына қатысты тапсырма берді

Тоқаев, сурет - Zakon.kz жаңалық 30.09.2022 11:29

Сурет: akorda.kz

Қасым-Жомарт Тоқаев Абай облысына жұмыс сапарымен барды. Сапар аясында президент Семей жұртшылығымен кездесіп, бірқатар мәселені айтты, деп хабарлайды Zakon.kz Ақордаға сілтеме жасап.

Президенттің сөзінше, Абай облысындағы мектептерде 9 мыңға жуық балаға орын жетіспейді. Осыған байланысты Тоқаев тапсырмалар берді.

Білім – бәсекеге қабілетті және табысты ұлт болудың басты кепілі. Қазір елімізде «Жайлы мектеп» ұлттық жобасы қолға алынып жатыр. Абай облысындағы мектептерде 9 мыңға жуық балаға орын жетіспейді. Алдағы уақытта 11 мектеп және 14 балабақша салу жоспарланған. Бірақ, мұның өзі жеткіліксіз. Үкімет пен әкімдікке облыс мектептеріндегі орын тапшылығы мәселесін біржола шешуді тапсырамын.Тоқаев

Президенттің айтуынша, облыста қазіргі заманға қажетті, жоғары деңгейдегі, білікті мамандар даярлау үшін нақты шаралар қабылдануы керек.

Осы орайда, Семейде университеттердің жанынан IT саласы мен тілдерді тереңдетіп оқытатын мектептер ашылуы қажет. Аймаққа қажетті кадрларды дайындау үшін тиісті стандарт әзірлеген жөн. Жастарымыз сапалы білім алып, туған өлкесін дамытуға үлес қосуға тиіс. Сол себепті, облыстағы жоғары оқу орындарына қосымша 500 грант бөлуді тапсырамын, - деді мемлекет басшысы.

Сонымен қатар президенттің тапсырмасы бойынша облыста медицина білім ордасы жанынан көпбейінді аурухана салу мәселесі қарастырылып жатыр.

Семейде еліміздегі негізгі медицина университеттерінің бірі орналасқан. Қазір менің тапсырмаммен білім ордасы жанынан көпбейінді аурухана салу мәселесі қарастырылып жатыр. Менің тапсырмам бойынша Семейде онкологиялық диспансердің радиологиялық орталығы пайдалануға берілді. Балаларды оңалту орталығы салынып жатыр. «Ауылдық денсаулық сақтауды жаңғырту» ұлттық жобасы аясында аймақта 65 нысан салынады. Біз ядролық сынақтардан зардап шеккен азаматтарымызды оңалту мәселесіне баса мән беруіміз керек, -деді президент.

Оқи отырыңыз