Денсаулық сақтау министріне Қазақстан атынан Pfizer вакцинасын жеткізу келісіміне қол қою өкілеттігі берілді

Сурет: Zakon.kz

Мемлекет басшысы Қасым-Жомарт Тоқаев 2022 жылғы 21 қарашадағы "Pfizer компаниясымен коронавирус инфекциясына қарсы вакцинаны жеткізу туралы келісімдер мен шарттарға, сонымен қатар оларға толықтырулар мен өзгерістер енгізу туралы" жарлыққа қол қойды, деп хабарлайды Zakon.kz.

"Денсаулық сақтау министрі өкілдік ететін Қазақстан Республикасының Денсаулық сақтау министрлігіне Қазақстан атынан Pfizer компаниясымен коронавирус инфекциясына қарсы вакцинаны жеткізу туралы келісімдер мен шарттарға, сонымен қатар толықтырулар мен өзгерістерге қол қоюға өкілеттік берілсін", - делінген құжатта.

Өз кезегінде үкіметке қаулыдан туындайтын шараларды қабылдау тапсырылды.

Жарлық қол қойылған күнінен бастап қолданысқа енгізіледі.

2022 жылдың шілдесінде ҚР Денсаулық сақтау министрі Ажар Ғиният азаматтардың жарамды санаттары үшін осы күзге жоспарланған Pfizer вакцинасының қосымша жеткізілімі туралы хабарлады. Ол кезде балалар мен жүкті әйелдерге арналған вакцинаның қалдықтары қолданылған.

Оқи отырыңыз