Алаяқтық үшін сотталған Ақтөбедегі бұрынғы аудан әкімі бостандыққа шықты
Сурет: gov.kz
Экс-әкім Абат Көбенов пен оның адвокаты апелляциялық шағымында бас бостандығынан айыру жазасын айыппұлға ауыстыруды сұраған. Олар сотталушы өз кінәсін толық мойындап, өкінетінін, келтірілген зиянды өтегенін, сонымен қатар оның қарт анасы, үш баласы бар, біреуі созылмалы психикалық аурумен ауыратынын айтқан.
Апелляциялық сатыдағы сот сотқа дейінгі тергеп-тексеру және бірінші сатыдағы соттың заң бұзушылықсыз өткенін анықтады. Көбенов сотталған баптың санкциясында бас бостандығынан айырумен қатар, ұрланған мүліктің жиырма еселенген мөлшерінде айыппұл түріндегі жаза қарастырылған. Қорғаушының уәждерін тыңдап, жеңілдететін мән-жайлардың бар-жоғын ескере отырып, сот алқасы сотталушының шағымын қанағаттандырып, бас бостандығынан айыру түріндегі жазаны айыппұлға өзгерту туралы шешім қабылдады.
"Ақтөбе қаласының №2 сотының 2022 жылғы 22 желтоқсандағы қаулысымен ҚР Қылмыстық кодексінің 190-бабы 3-бөлігінің 2-тармағымен сотталған Абат Көбеновке қатысты үкімді 13 839 150 теңге сомасында айыппұл түріндегі жазаға өзгерту туралы шешім шығарылды. Сонымен қатар өмір бойына бас бостандығынан айырумен мемлекеттік қызметте, жергілікті өзін-өзі басқару органдарында, ҚР Ұлттық банкінде, квазимемлекеттік сектор субъектілерінде лауазымдарды атқару құқығымен", – делінген сот қаулысында.
Ол сот залында қамаудан босатылды.
2022 жылдың 26 қазанында Ақтөбе қаласы Алматы ауданының экс-әкімі Абат Көбенов алаяқтық жасағаны үшін үш жылға бас бостандығынан айырылды. Ол 2020 жылы Ақтөбе қаласы әкімдігінің аппарат басшысы бола тұра, досына жер телімін беремін деген желеумен 2020 жылы одан 1 383 000 теңге алғаны үшін кінәлі деп танылды. Бірақ уәде орындалмады. Ал соңында бұл соманы қайтару кешіктірілді.
