"Қашпаңыздар!". Түрік құтқарушысы жер сілкінісі кезінде адамдар өзін қалай ұстау керектігін айтты

Әлеуметтік желі, сурет - Zakon.kz жаңалық 13.02.2023 20:45

Сурет: видеодан алынды

Түрік құтқарушыларының бірі адамдардың жер сілкінісі кезінде өзін қалай ұстайтынын білмегенін айтып, зор өкініш білдірді. Ол, көбіне адамдардың денесін баспалдақ бойынан тауып алып жатқандарын айтып, қашып, дүрбелеңге салынудың жалпы дұрыс емес екенін жеткізді, деп хабарлайды Zakon.kz.

Зілзала кезіндегі қорғаныс бойынша түрік құтқарушысының айтқан ақыл-кеңесінің видеосы әлеуметтік желіде жарияланды.

"Мен қазір үйінділер жанындамын, іздеу-құтқару жұмыстарын жалғастырып жатырмыз. Сіздерге мынаны айтқым келеді, жер сілкінісі кезінде өзіңіз отырған диван немесе төсек жанына ұзыннан жата қалыңыз, сонда аман қалу мүмкіндігі жоғары. Қашу - ең қауіптісі. Біз адамдардың денесін көбіне баспалдақ бойынан тауып жатырмыз. Өтінемін, қашпаңыздар", - дейді ол.

Оның айтуынша, көзге көрінген берік жерге шапшаң орналаса қойған жөн.

"Өзіңізбен міндетті түрде су мен аздап қанттың болғаны абзал. Қант көп уақыт шыдауға мүмкіндік береді. Сондай-ақ Сізді еститіндей қолыңызда зат болғаны дұрыс. Бұл - телефон, ысқырық, тағысын тағы. Уақыт өте келе адамның күші сарқылады, дем жетпейді. Осыны ұмытпаған жөн", - дейді құтқарушы оқиға орнынан.

Айта кетсек, Түркияда 6 ақпанда қатты жер сілкінісі болды. Күннен күнге қаза тапқандар саны артып келеді.

Оқи отырыңыз