Қазақстан киберспорттан әлем чемпионатын өткізбекші

киберспорт, сурет - Zakon.kz жаңалық 01.03.2023 23:52

Сурет: realnoevremya.ru

ҚР Мәдениет және спорт министрі Асхат Оралов Халықаралық дзюдо федерациясының (IJF) бас директоры және халықаралық киберспорт Федерациясының (IESF) Президенті Влад Маринескумен кездесті, деп хабарлайды Zakon.kz.

Тараптар Қазақстанда екі ауқымды іс-шараны: дзюдодан "Үлкен дулыға" турнирлерін және киберспорттан әлем чемпионатын өткізуді талқылады. Министр мұндай іс-шаралардың жастарды спортқа тартудағы маңызын айтып, сонымен бірге Қазақстанның киберспорттан келесі Әлем чемпионатын қабылдауға дайын екенін мәлімдеді.

"Сенім білдіргеніңіз үшін рақмет. Қазақстанда дзюдодан тұңғыш Grand Slam жоғары деңгейде өтетініне сенімдімін. Біздің басты басымдығымыз — бұқаралық спорт және салауатты өмір салтын насихаттау. Чемпиондар жастар спортпен белсенді айналысатын жерде пайда болады. Бұл балалардың дені сау және табысты азамат болып өсуіне көмектеседі. Әрине, отандастарымыздың жеңісі әркез бізді қуантады. Мысалы, өткен жылы Қазақстан командасы PUBG бойынша әлем чемпионы атанды. Елімізде киберспорттан келесі Әлем чемпионатын өткізу қосымша ынталандыру болатыны сөзсіз". Мәдениет және спорт министрі Асхат Оралов

IJF және IESF басшысы Влад Маринеску киберспорттан келесі әлем чемпионатының Қазақстанда өтуін қолдайтынын жеткізді.

"Сізде жастармен жұмыс істеу тәжірибесі мол екенін білемін. Болашақта жаңа чемпиондарды дайындап, дені сау және мықты жас ұрпақты тәрбиелеуде жетістікке жетесіздер деп үміттенемін. Қазақстандық жастардың дзюдода да, киберспортта да әлеуеті өте зор. Өткен жылғы PUBG әлем чемпионатындағы жетістік мұның айқын дәлелі. Мен сіздерді осы маңызды жеңіспен құттықтап, келесі әлемдік біріншіліктің Қазақстанда өтуі үшін бізге байланысты барлық мәселенің оң шешім табатынын айтқым келеді". IJF және IESF басшысы Влад Маринеску

Сондымен бірге шетелдік қонақ Асхат Ораловты Катар астанасы Дохада мамыр айында өтетін дзюдодан әлем чемпионатына шақырды.

Оқи отырыңыз