Түркістан облысында қаскөйлер брокерді соққыға жығып, 2,7 млн теңгесін тонап кеткен

Тонау, сурет - Zakon.kz жаңалық 11.04.2023 20:04

Сурет: видеодан алынды

Келес аудандық ПБ-ға брокер болып жұмыс істейтін жергілікті тұрғын арызданды. Ер адам өзін түнде белгісіз біреулер ұрып-соғып, ішінде 360 мың теңге, 2000 АҚШ доллары және 57000 рубль, сондай-ақ Iphone екі телефоны болған барсеткасын алып кеткенін айтты, деп хабарлайды Zakon.kz.

Өңірлік ПД баспасөз қызметі хабарлағандай, аталған факт ҚР ҚК-нің 191-бабы 2-бөлігі - "Тонау" бойынша тіркелді.

Шығын - 2,7 млн теңге.

"Жедел-іздестіру іс-шараларының нәтижесінде, 6 күдікті ұсталды. Олар Келес ауданы мен Шымкент қаласының тұрғындары болып шықты. Күдіктілерден заттай дәлел ретінде екі ұялы телефон мен ұрланған ақшаның бір бөлігі тәркіленді. Сонымен қатар күдіктілердің екеуі Келес ауданындағы кеден бекеті аймағында жұмыс істейтіні, олар жүк көліктерінің жүргізушілері мен брокерлерді бопсалаумен айналысқаны анықталды", делінген полиция хабарламасында.

Қазір сотқа дейінгі тергеу амалдары жүргізілуде. Күдіктілер ПБ-ға жеткізілді. Олардың басқа да қылмыстарға қатысы мен оқиғаның мән-жайы анықталып жатыр.