Тоқаев: Елімізде ұзақ жыл бойы ғылымға баса назар аударылған жоқ

Ғылым күні, Ғылым және технологиялар жөніндегі ұлттық кеңестің отырысы , сурет - Zakon.kz жаңалық 12.04.2023 15:02

Сурет: akorda.kz

12 сәуір күні мемлекет басшысы Қасым-Жомарт Тоқаевтың төрағалығымен Ғылым және технологиялар жөніндегі ұлттық кеңестің отырысы өтті, деп хабарлайды Zakon.kz.

Алдымен Президент басқосудың мән-маңызына тоқталды.

"Қай заманды алып қарасақ та, дамудың басты кілті бұл – ғылым. Адамзат тарихындағы жетістіктің барлығы – білімнің жемісі. Әсіресе қазіргі озық технология дәуірінде ғылымсыз алға басу мүмкін емес. Сондықтан мен ғылымды дамыту ісіне айрықша мән беріп отырмын", – деді Мемлекет басшысы.

Ғылымды дамыту – мемлекет саясатындағы ең маңызды бағыттың бірі екенін алға тартқан ол ғылым назардан тыс қалып келгенін тілге тиек етті.

"Өкінішке қарай, елімізде ұзақ жыл бойы оған баса назар аударылған жоқ. Соған байланысты шешімін таппай жатқан мәселелер аз емес. Тіпті, бұл сала артта қалды деуге болады. Біз өркениетті ел боламыз десек, осы олқылықтың орнын толтыруымыз керек. Сол себепті менің Жарлығыммен Ғылым және технологиялар жөніндегі ұлттық кеңес құрылды. Оған Президент жанындағы кеңес мәртебесі берілді".Қасым-Жомарт Тоқаев

Бұл – мемлекеттің ғылым саласындағы басымдықтарына қатысты ұсыным әзірлейтін негізгі құрылым.

"Біз кеңесті жасақтаған кезде оның құрамына айрықша мән бердік. Қазақ ғылымына зор еңбек сіңірген аға буын өкілдерін және шетел ғалымдарын шақырдық. Әлемге әйгілі ғылыми орталықтарда жұмыс істеп жүрген жас ғалымдарымыз да кеңестің құрамына қосылды. Бізге алдыңғы толқынның мол тәжірибесі, кейінгі толқынның озық білімі және тың идеялары аса қажет. Олар өзара үйлесім тауып, еліміздің кәдесіне жарайды деп сенемін", – деді Президент.

Оқи отырыңыз