Тоқаев ел азаматтарын Отан қорғаушылар күнімен құттықтады

Құттықтау, сурет - Zakon.kz жаңалық 07.05.2023 09:00

Сурет: akorda.kz

Мемлекет басшысы Қасым-Жомарт Тоқаев жетінші мамырда Қазақстан азаматтарын Отан қорғаушылар күнімен құттықтады, деп хабарлайды Zakon.kz.

"Сіздерді Отан қорғаушы күнімен шын жүректен құттықтаймын! Бұл – тек әскери қызметшілер үшін ғана емес, баршамызға ортақ қастерлі мереке. Елін қорғау – әрбір азаматтың перзенттік парызы. Туған жерге деген шексіз сүйіспеншіліктің жарқын көрінісі. Мемлекетіміздің қорғаныс қабілетін арттыру – негізгі стратегиялық мақсатымыздың бірі".Қазақстан Президенті Қасым-Жомарт Тоқаев

Сондай-ақ Президент Қазақстан армиясы кез келген жағдайда мемлекетімізді қорғауға дайын болуы керектігін де атап өтті. Қарулы Күштеріміз еліміздің егемендігі мен тұтастығының және халқымыздың мызғымас бірлігі мен жарқын болашағының кепілі болып қала береді.

"Бүгінде жауынгерлеріміз батыр бабаларымыздың даңқты жолын жалғастырып, ел тыныштығын қырағылықпен күзетіп тұр. Олардың қауіпсіздікті қамтамасыз ету жолындағы қалтқысыз қызметі – өскелең ұрпаққа әрдайым үлгі-өнеге". Қасым-Жомарт Тоқаев

Мемлекет басшысы жүктелген міндетті мінсіз атқарып, антына адалдық танытып жүрген барлық сарбаздарға шынайы ризашылығын білдірді.

"Армиямыздың айбыны асқақтай берсін! Еліміздің іргесі әрдайым берік болсын! Әскери қызметшілерге, ардагерлерге және барша отандастарымызға зор денсаулық, қажымас қайрат пен бақ-береке тілеймін!", - деді Президент.

Қазақстанда 7 мамырда Отан қорғаушылар күні атап өтіледі. 1992 жылдың 7 мамырында ҚР Ұлттық Қарулы Күштерін құру туралы Жарлыққа қол қойылды.

Оқи отырыңыз