Жыл басынан бері мемлекеттік бюджетке 6,1 трлн, республикалық бюджетке 4 трлн теңге кіріс түскен
Сурет: freepik
Министрдің сөзінше, биыл мемлекеттік бюджетке 6,1 трлн теңге сомасында кірістер түсті немесе жоспар 104,6% орындалды. Республикалық бюджетке 4 трлн теңге кіріс түсті. Жоспар 92,3% орындалды. Атқарылмаған бөлігі 336 млрд.теңгені құрады.
"Атап айтқанда салықтар бойынша жоспардың 369 млрд теңгеге орындалмауы негізінен корпоративтік табыс салығының, шикі мұнайға экспорттық кедендік баждың және қосымша құн салығының есебінен қалыптасты. Корпоративтік табыс салығы бойынша жоспардың орындалмауы 2023 жылдың 4 айында 258 ірі салық төлеуші бойынша мәлімделген аванстық төлемдер сомасының былтырғы осыған ұқсас кезеңімен салыстырғанда 33% немесе 86 млрд теңгеге азаюымен байланысты. Сонымен қатар оған негізгі экспорттық тауарлар бағасының орташа 12% төмендеуі әсер етті". Ерұлан Жамаубаев
Шикі мұнайға экспорттық кедендік баж бойынша жоспардың негізгі орындалмауы экспорттық кедендік баждың нақты қалыптасқан ставкасының болжамды көрсеткішінен 14,7% төмендеуімен байланысты болды.
Қосылған құн салығы бойынша жоспардың орындалмауының себептері:
- тауар, жұмыс және қызметтерді өткізу бойынша айналым сомасының 13% азаюы;
- қосылған құн салығы бойынша қайтарымының 37% артуы;
- Еуразиялық экономикалық кеңес елдерімен импорт көлемінің 7% азаюы.
Сонымен қатар министр жергілікті бюджеттердің кірісі 140%-ке атқарылды және 2,1 трлн теңге болғанын айтты. Жоспар 607 млрд теңгеге, оның ішінде салықтар бойынша – 565 млрд теңгеге асыра орындалды. Кіріс бойынша жоспарлар барлық өңірлерде асыра орындалды.
