Қырғыз музыканты Қазақстанның Ішкі істер министрлігін сотқа берді, алайда талап-арыз қанағаттандырылмады

Қырғыз музыканты, сот, ҚР ІІМ, қаңтар оқиғасы, сурет - Zakon.kz жаңалық 25.05.2023 17:59

Сурет: Instagram/vicrammusic

Қырғызстандық музыкант Викрам Рузахунов ар-намысын, абыройын және іскерлік беделін қорғау үшін Астананың Алматы аудандық сотына ҚР Ішкі істер министрлігінің үстінен шағым түсірді, деп хабарлайды Zakon.kz.

Бұл жаңалықты әнші Instagram парақшасында бөлісті.

2022 жылдың қаңтар айының басында Викрам Рузахунов қаңтардағы тәртіпсіздіктерге қатысты деген күдікпен Қазақстанда ұсталды. Бұл факті расталмағандықтан, ол қамаудан босатылды. Кейін музыкант өзін полицейлер азаптағанын мәлімдеді.

Сол жылдың 9 қаңтарында "Қазақстан" телеарнасы Викрам Рузахуновтың Алматыдағы тәртіпсіздікке қатысқаны жайлы бейнеролик көрсетті. Рузахунов Астана қаласының Алматы аудандық сотына Ішкі істер министрлігіне қарсы шағымданып, видеода таратылған ақпаратты шындыққа жанаспайды деп тану, ақпаратты теріске шығару міндеттемесін жүктеп, сол телеарна арқылы ресми түрде көпшілік алдында кешірім сұрауды талап еткен.

Сот Рузахуновтың бейнеролик жауапкер – ҚР ІІМ-нің бастамасымен телеарнадан көрсетілді деген уәжі расталмағанын хабарлады. Сот шешімімен қырғыз музыкантының талабын қанағаттандырудан бас тартылды.

Сот үкімі заңды күшіне енген жоқ.

Оқи отырыңыз