"Ролан Гаррос" турнирінде Қазақстаннан ешкім қалмады
Сурет: Қазақстан теннис федерациясы
Қазақстанның жұптық сындағы бірінші, әлемнің 25-ракеткасы Анна Данилина мажарстандық Тимея Бабошпен бірге екінші айналымда тайбэйліктер Латиша Чань — Хао-Чин Чаньмен кездесті
Қазақстандық-мажарстандық жұп 1,5 сағаттан астам уақытқа созылған матчта 6:7 (3:7), 3:6 есебімен жеңілді.
Александр Недовесов мексикалық Мигель Анхель Рейес-Вареламен бірге ширек финалға шыға алмады. Олар үшінші айналымда доданың 1-ракеткалары, нидерландылық Уэсли Колхоф – ұлыбританиялық Нил Скупскиге жол берді – 5:7, 4:6. Бұл бәсеке 1,5 сағатқа жуық уақытқа созылды.
Осылайша, Франция ашық чемпионатында Қазақстаннан ешкім қалмады.
Еске салайық, бұған дейін Қазақстанның бірінші, әлемнің 4-ракеткасы Елена Рыбакина жекелей сында "Ролан Гаррос" турнирін жалғастырудан бас тартқан еді. Бұл туралы теннисшінің өзі үшінші раундтағы кездесуіне санаулы минуттар қалғанда мәлімдеді. Ол кеше, 3 маусымда испаниялық теннисші Сара Соррибес Тормомен ойнауы керек болған. Алайда Елена Рыбакина қызуы көтеріліп, екі күннен бері басы ауырғанын және дұрыс ұйықтамағанын айтты.
