Алматыда 200 мыңға жуық адам орталық сумен жабдықтау жүйесіне тұрақты қосылмаған
Сурет: pexels
Қала әкімі 16 қарашада Мемлекет басшысы қала жұртшылығымен кездесу кезінде Алматының әрбір азаматы үшін қолайлы ортаны дамыту жөнінде бірқатар тапсырмалар бергенін айта кетті.
Қазіргі уақытта Алматы қаласында 200 мыңға жуық адам орталық сумен жабдықтау жүйесіне тұрақты қосылмағанын сөз еткен әкім осы мәселені шешу бағытында атқарылатын жұмыстарға мен бөлінген қаражатқа тоқталып өтті.
Тұрғындарды, бірінші кезекте қаланың батыс бөлігіндегі халықты ауыз сумен қамтамасыз ету мақсатында, 2023 жылдың маусым айында Қарғалы өзенінде су жинау құрылғысын салу жұмыстарын аяқтау және Ақсай өзеніндегі су жинау құрылғысының құрылыс-монтаждау жұмыстарын одан әрі жүргізу үшін келесі жылы 8,6 млрд теңге қарастырылған.Алматы қаласының әкімі Ерболат Досев
Сондай-ақ ол 4,4 млрд теңгеге Нижняя Пятилетка, Шуақты, Жас Қанат, Каменское Плато, Кеңсай және т.б. шағын аудандарда сумен қамту және су бұру желілерінің құрылысы жалғасатынын атап өтті.
Шаңырақ-1,2, Өжет шағын аудандарында, Қазыбаев – Рысқұлов – Тәтібеков –Райымбек көшелерінің бөлігінде және т.б. 2023 жылдың соңына дейін 3,2 млрд. теңгеге инженерлік желілердің құрылысы аяқталады.
Сонымен бірге, Юбилейныйдан Көлсай шағын ауданына дейін, Алғабас және Маяк, Шапағат шағын аудандарында, Әлмерек ауылында 10,8 млрд теңгеге сумен жабдықтаудың магистральды және таратушы желілерінің жаңа құрылысы басталады, 170 мыңға жуық тұрғын қамтылады.Ерболат Досаев
Қала әкімінің сөзінше, 4,6 млрд теңгеге Кемел, Әлмерек, Колхозшы, Шуақты шағын аудандарында, Палладин көшесінде электрмен жабдықтау желілері мен 2 қосалқы станцияның құрылысы аяқталады. Оның айтуынща, бұл 540 мың тұтынушыны үздіксіз электрмен қамтуға мүмкіндік береді.
Келер жылы Алмалы және Жетісу аудандарының (Айнабұлақ ықшам ауданы) жылу желілерін қайта жаңғырту жұмыстары басталады. Бұл мақсатқа бюджеттен 1,6 млрд теңге бөлінді. 1,5 млрд теңгеге Құлагер шағын ауданының және Қазыбек би көшесінің бойындағы Абдуллиндер және Уәлиханов көшелерінің арасындағы желіні жаңғырту жұмысы аяқталады. Бұл 113 мың тұрғынның мәселесін шешуге септігін тигізеді.
