Грузияда парламенттік сайлау нәтижесіне қарсы наразылық акциясы бұрқ етті
Сурет: X(Twitter)/@NeilPHauer
Әлеуметтік желіде митинг кезінде түсірілген фотосуреттер мен видеолар тарауда. Куәгерлер Парламенттің жанына бірнеше мың адам жиналғанын, қолдарында Грузия мен Еуропалық Одақтың тулары барын мәлімдейді. Полиция көліктері сол жерде кезекшілік етуде.
Сондай-ақ, алаңға Грузия Президенті Саломе Зурабишвили келгені белгілі, көпшілік оның атын ұрандап шақырды. Жергілікті басылымның хабарлауынша, президент сайлауды "заңсыз" деп жариялады, ол кезектен тыс сайлау жариялауы мүмкін деп күтіледі.
Оппозиция парламенттік сайлау нәтижелерін мойындаудан бас тартқаннан кейін наразылық акцияларын жариялады. ОСК-ның алдын-ала мәліметтері бойынша, "Грузин арманы" шамамен 54% дауыс алған. Оппозиция бұл цифр алаяқтықтың салдары деп санайды.
Politico басылымының хабарлауынша, 28 қазанда төрт парламенттік оппозициялық топ ұлттық ассамблеяға бойкот жариялауға келісті, өйткені азаматтық қоғам "Грузин арманы" билеуші партиясының нәтижелеріне заңсыз ықпал ету әрекеттерін байқаған.
Georgian President Salome Zourabichvili speaking now. She had already declared the elections as 'illegitimate' - expectation is that she may call for snap elections pic.twitter.com/ElOFz9fSxq
— Neil Hauer (@NeilPHauer) October 28, 2024
"Сайлау нәтижелері грузин халқының таңдауын білдірмейді. Біз "Грузин арманына" парламенттік өкілдік бермейміз", - деді бұрынғы премьер-министр және "Грузия үшін" оппозициялық блогының төрағасы Георгий Гахария.
Сонымен қатар, Грузияның қазіргі премьер-министрі Ираклий Кобахидзе бұған жауап ретінде "Грузин арманына" Парламентте оппозицияның жұмыс істейтін-істемейтіні түк қызықтырмайтынын айтты.
Грузия заңнамасына сәйкес, Парламенттің өкілеттігін мойындау үшін 76 депутат қажет. "Грузин арманы" сайлау қорытындысы бойынша 89 орын алады. "Мықты Грузия" оппозициялық коалициясының жетекшісі Мамука Хазарадзе акцияның бейбіт сипатта екенін және одан әрі іс-қимыл жоспары жарияланатынын атап өтті. Сонымен бірге Грузияға Венгрияның премьер-министрі Виктор Орбан келді. Ол Грузия үкіметінің басшысы Ираклий Кобахидземен кездеспекші. Венгрия ЕО-ға төрағалық етеді, бірақ еуропалық дипломатияның басшысы Джозеп Боррель Орбанның сапары Еуропалық Одақтың ресми миссиясы емес, жеке бастамасы екенін айтты.
