Кибершабуыл 2017 жылы қазақстандықтарға 1 миллион доллардан артық шығын әкелді. Бұл туралы «Касперский зертханасының» Қазақстан, Орталық Азия және Монғолия елдеріндегі директоры Евгений Питолин айтты, деп хабарлайды Baq.kz aқпарат агенттігі LS сайтына сілтеме жасап.
Ол шығын мөлшері аталған саннан әлдеқайда жоғары болуы мүмкін екенін айтты, бірақ ашық мәліметтердің жоқтығына байланысты нақты ақпарат бермеді. Сол себепті шамамен бағалауға ғана мүмкіндік бар.
«1 миллион доллардан кем емес – бұл жүйенің бос тұруы мен басқа факторларды есептегенде. Бірақ, шығын бұдан көп. Мәселе осында – Қазақстанда компаниялар мұндай оқиғаға байланысты ақпарат беруге міндетті емес. Ал Еуропа мен АҚШ-та заң кибершабуыл туралы ақпаратты жариялауға міндеттейді. Сондықтан, Қазақстанда ресми статистика жоқ, біз тек жасаған аналитикамызға байланысты жорамалдаймыз. Мысалы, Қазақстан қолданушылары кибералаяқтықтың әсерінен қаржысынан айрылып, қиналған елдердің алғашқы бестігіне кіреді екен», - деді Евгений Питолин.