Қазақстан халқының бірлігі күні 500 домбырашыдан құралған оркестр «Бәйтерек» монументінің алдындағы алаңда Құрманғазының әйгілі «Сарыарқа» күйін орындайды. Бұл туралы Астана қаласының мәдениет және спорт басқармасы мәлімдеді, деп хабарлайды Елорда инфо.
1 мамыр – Қазақстан халқының бірлігі күні 500 домбырашыдан құралған оркестр «Бәйтерек» монументінің алдындағы алаңда Құрманғазының әйгілі «Сарыарқа» күйін орындайды. Флэшмоб қазақ халқының мәдениеті мен музыкасын дамыту, патриоттыққа тәрбиелеу мақсатында Астана қаласының мәдениет және спорт басқармасымен ұйымдастырылады.
"Елорданың 20 жылдығына орайластырылған «Ұлы дала үні» атты ауқымды шараға музыкант ретінде де, көрермен ретінде де қатысуға болады. Ашық аспан астында өтетін мерекелік флешмоб кезінде қазақ ұлттық музыкалық аспабының керемет үні жиналған қауымның жүрегін тербеп, рақатқа бөлейді", - дейді қалалық мәдениет және спорт басқармасындағылар .
Флешмобқа қатысу үшін dombyra-flashmob.kz сайтында тіркеуден өтіп, байланыс телефонын қалдыру керек.
Айта кетейік, сондай-ақ сайтта шараның өткізілуіне неше күн қалғаны көрсетіліп отырады. Шара 1 мамырда сағат 15:00-де өтеді.
Сонымен қатар флешмобқа белгілі айтыскер ақындар да қатысады. Жандарбек Булгаков пен Сара Тоқтамыс қонақтарды өз шеберліктерімен тәнті етпек. Бұдан басқа, «NOMAD» инструменталды жобасы өзінің танымал композицияларын орындайды.