ҚР Еңбек және халықты әлеуметтік қорғау министрі Біржан Нұрымбетов Алматыда ұшақ апатынан қаза болғандардың туыстарына материалдық көмек ақша қалай берілетіні туралы айтты, деп хабарлайды zakon.kz.
- Үкімет ұшақ апатынан қаза тапқандардың әрқайсысына 4 миллион теңгеден төлеуге шешім қабылдады. Министрлік осы сипатта қаулы әзірледі және бүгін оған дауыс берілді. Бұл қаражат марқұмдардың отбасы мүшесінің жеке шотына аударылады, - деді Нұрымбетов үкімет дәлізіндегі журналистерге берген сұқбатында.
Ол ұшақ апатынан зардап шеккендерге материалдық өтемақы төлеу туралы шешімді қала мен облыс әкімдіктері қабылдайтынын нақтылай кетті.
- Марқұмның туыстарына ақша төлеу жайына келетін болсақ, 27-і апат болды, 28-і күні өтемақы төлеу туралы шешім қабылданды, бірақ үкімет оған бүгінгі отырыста дауыс берді және бұл ақшаны бүгін Еңбек министрлігіне береді. Біз оларды қысқа мерзім ішінде жеке шоттарға аударамыз, - деп түсіндірді министр.
Айта кетсек, 27 желтоқсанда 98 адам, оның ішінде бес ұшақ экипажы болған Алматы - Нұр-Сұлтан бағытына Алматы әуе-жайынан ұшып шыққан Bek Air компаниясына тиесілі жолаушылар ұшағы апатқа ұшырады, Салдарынан 12 адам қаза тапты.