Атырау облысы әкімінің орынбасары Жасұлан Бисембиевтің айтуынша, жарық сөнген кезде "109" қызметіне қоңырау шалу көлемі 50 есеге артқан.
Қардың қалың түсуіне байланысты жолдарда қозғалыс қиындаған. Тас жолдарда қозғалыс шектеліп, кейбір учаскелер толығымен жабылды. Полицияның хабарлауынша, қазіргі уақытта Атырау – Астрахань тас жолында қозғалыс қайта жанданды. Облыс аумағындағы республикалық маңызы бар автомобиль жолдарының қалған бөлігі барлық көлік құралдары үшін қазір ашық.
8 ақпанда таңертең қардың қалың түсуіне байланысты қала маңына қатынайтын бес қоғамдық көлік жолға шықпады. Қалалық қоғамдық көліктердің қозғалысына қатысты мәселе туындаған жоқ.
Атыраудағы жолдарда қиындық туындап, кептелістер пайда болды. 24 бағдаршам бірден істен шықты. "Сергек" камералары да сөніп қалды.
Әкімдік отырысында қала басшысы Мейірім Қалауи қаланың әлеуметтік нысандары мен орталық даңғылдарын, сондай-ақ орталық көпірді тазалауға "Спецавтобаза" ЖШС-нің 76 техникасы мен 250 жұмысшысы тартылғанын атап өтті. Жеке сектор тұрғындары оларды күтпестен қарды тазалауға өздері кірісіп кетті.