Таиланд полициясының мәліметіне сай, Дархан Жүнісбеков 24 ақпанда Пхукет аралында опат болды.
"Біздің азамат жалдамалы мопедпен жүріп жол көлік апаты салдарынан қаза тапқан. Консул марқұмның туыстарымен байланыс ұстап отыр. Мәйітті Қазақстанға жіберу үшін қажет құжаттарды рәсімдеу бойынша жұмыс жүргізіліп жатыр", - делінген Сыртқы істер министрлігінің хабарламасында.
Бірер уақыт бұрын Darkhan Juzz лақап атымен танылған музыкант қайтыс болғаны хабарланған еді. Бұл туралы Ерлан Қарин Instagram-дағы парақшасында жазды.
Дархан Жүнісбеков 1991 жылы 9 тамызда Алматыда дүниеге келген. Көпке Darkhan Juzz деген атпен танылған әнші - "Үйде", "Сапар", "Шекер", "Кейіпкер" әндерін шығарып, өзі оны орындайтын. Оның инди-поп жанрындағы әндері ерекше жаңа стиль алып келген еді.