Гвинея-Бисау астанасы Бисау қаласының 490 мыңнан астам тұрғыны бір жарым тәулікке жуық уақытты жарықсыз өткізді. Оған ел билігінің қаланы энергиямен қамтамасыз етіп отырған түріктің Karpowership компаниясына төлемді кешіктіргені себеп болған. Қарыз көлемі - 17 миллион доллар. Бұл туралы The Guardian жазды.
Karpowership 2019 жылдан бері Гвинея-Бисауды барлық электр қуатымен қамтамасыз етіп келеді. Елді энергиямен қамтамасыз ету 100% түрік компаниясына тәуелді.
Бір жарым тәуліктен кейін Гвинея-Бисау үкіметі қарыздың бір бөлігін өтеді және мемлекеттік коммуналдық кәсіпорынның қаражаты арқылы (оның жалпы активтерінің үштен бірінен астамы) 6 миллион доллар төледі. Осыдан кейін Karpowership Бисауды электрмен жабдықтауды қалпына келтіруге келісті. Қазір африкалық елдің билігі қарызды ішінара өтеу жөнінде түрік компаниясымен келіссөз жүргізбек.
Гвинея-Бисау — Африканың батысындағы шағын мемлекет. Оның халқы 1,6 миллионнан сәл ғана асады. Бисау – елдегі жалғыз ірі қала. Онда жалпы халықтың үштен бір бөлігі тұрады.