Заңның мақсаты – Уағдаласушы мемлекеттердің қылмысқа қарсы күресте тиімді ынтымақтастығын қамтамасыз ету, қылмыстық құқық бұзушылықтарға қатысты рәсімдерде барынша және өзара құқықтық көмек көрсету. Заңның міндеті – 2022 жылғы 20 қазанда Никосияда жасалған Қазақстан Республикасы мен Кипр Республикасы арасындағы ұстап беру туралы шартты (бұдан әрі – Шарт) ратификациялау.
Шарт іздестіріліп жатқан адамдарды қылмыстық жауаптылыққа тарту үшін оларды екі мемлекет арасында экстрадициялау мәселелерін регламенттейді. Адамдарды ұстап беру, ұстап беруді кейінге қалдыру немесе уақытша ұстап беру шарттары мен рәсімі айқындалған. Ұстап беруден бас тарту үшін міндетті және факультативтік негіздер белгіленген, ұстап беру туралы сұрау салу және қажет құжаттар көзделген.
Шартта ұстап беруден бас тарту үшін міндетті және факультативтік негіздер белгіленген. Атап айтқанда, егер:
- ұстап беру сұратуға себеп болған қылмыс Сұрау салынатын Уағдаласушы мемлекеттің аумағында жасалса және оның юрисдикциясына жатса және іздестіріліп жатқан адам дәл сол қылмыс үшін аталған мемлекетте тергеуде болса және оның құзыретті органдары оны сот тәртібімен қудалайтын болса;
- қылмыстың ауырлық дәрежесін және Сұрау салушы Уағдаласушы мемлекеттің мүдделерін ескере отырып, ұстап беру іздестіріліп жатқан адамның жасына, денсаулығына немесе өзге де жеке басының мән-жайларына орай ізгілік түсініктерімен үйлеспесе;
- оған қатысты ұстап беру туралы сұрау салу түскен қылмыс Сұрау салынатын Уағдаласушы мемлекеттің аумағынан тыс жерде жасалса, бірақ оның мүдделеріне қарсы бағытталса, Шартпен ұстап беруден бас тартылуы мүмкін.
"Уағдаласушы мемлекеттердің өз азаматтарын ұстап беруге жол берілмейді. Шартты орындауға байланысты шығысты реттейтін нормалар, келіспеушіліктерді реттеу тәртібі және Шартты орындауға байланысты басқа да нормалар көзделген. Шартты ратификациялау екі елдің қылмысқа қарсы іс-қимыл мәселелері бойынша құқықтық ынтымақтастығының тиімділігін арттырады және екіжақты қатынастарды нығайтуға ықпал етеді. Бұдан басқа Шартты ратификациялаған жағдайда оны іске асыру теріс әлеуметтік-экономикалық және құқықтық салдарға алып келмейді, сонымен қатар қосымша қаржылық шығындарды талап етпейді", - делінген Конституциялық заңнама, сот жүйесі және құқықтық қорғау органдары комитетінің төрағасы Нұрлан Бекназаров қорытындысында.