CNBC дерегінше, комиссия Disney кейбір YouTube видеоларын жүктеген кезде олардың балаларға арналғанын көрсетпеген деп айыптап отыр. Осылайша дұрыс таңбаланбаған бейнероликтер арқылы Disney 13 жасқа дейінгі көрермендердің жеке деректерін жинап, оларды балаларға арналған мақсатты жарнама үшін пайдаланған.
Шағымда Disney АҚШ-тағы балалардың интернеттегі құпиялылығын қорғау ережесін бұзғаны көрсетілген. Бұл ережеге сәйкес, 13 жасқа толмаған балаларға арналған веб-сайттар, қосымшалар және басқа да онлайн сервистер ата-аналарды жиналатын жеке ақпарат туралы хабардар етуі және деректерді жинамас бұрын ата-ананың келісімін алуы тиіс.
Сот Disney компаниясына өз видеоларын "балаларға арналған" деп дұрыс таңбалауды қамтамасыз ететін аудиторияны анықтау бағдарламасын енгізуді міндеттеді.
Сот шешіміне қатысты Disney өкілі:
"Disney балалардың құпиялылығын қорғау заңдарын сақтау тұрғысынан әрқашан ең жоғары стандарттарды ұстанып келеді. Біз бұл салада көшбасшы болу үшін қажетті құралдарға инвестиция салуды жалғастырамыз", – деп мәлімдеді.
Бұған дейін үндістандық әйелдің діни рәсімді сылтауратып танысының баласын ұрлап кеткенін жазғанбыз.