ҚР Қорғаныс министрлігінің баспасөз қызметінен хабарлағандай, 15 желтоқсанда таңғы сағат 4 шамасында Алматыда жатақханада тұратын Құрлық әскерлері Әскери институтының әскери қызметшісі, 3-сыныптағы сержант Жандос Барлыбаев көрші ғимаратта өрт болып жатқандығы туралы телефон арқылы таныстарынан білген.
Жандос тез киініп, сыртқа жүгіріп шыққанда көрші жатақхананың 2-ші қабаты өртеніп жатқанын көреді. Ол терезелердің сыртындағы торлар арқылы екінші қабатқа тез көтеріліп, өртенген бөлме ішінен 12-13 жас аралығындағы жасөспірім мен төрт айлық нәрестені алып шықты, сонымен қатар олардың анасының да сыртқа шығуына көмектескен.
Әскери қызметшінің ержүрек әрекеті туралы Құрлық әскерлері Әскери институтының басшылығына төтенше жағдайлар бөлімшесінің қызметкерлері хабарлаған.