Тамақтан уланды деген 9 баланың төртеуін сараптама растады. Улану себебі – мектеп асханасында сапасыз тамақ. Асханада тексеру жүргізіліп жатыр, деп хабарлайды Pavlodarnews.kz облыстық санитарлық-эпидемиологиялық департаментіне сілтеме жасап.
Айта кетсек, 9 қыркүйек күні Шарбақты ауданындағы №2 мектептің 9 оқушысы Шарбақты ауруханасына ем іздеп барған. Балалар сол күні таңғы сағат 9-дан кешкі сағат 20:40 дейін бірінен соң бірі ауруханаға келген. Құсу, іш ауруы, диарея және дене қызуының 39 градусқа дейін көтерілуіне қатысты шағым білдерген. Санэпидемиологтардың болжамынша, оқушылар мектеп асханасында улануы мүмкін, өйткені олардың бәрі сол жерде тамақтанған. Төрт бала Павлодардағы облыстық балалар ауруханасына жеткізілген болатын. Олардың ішінде үш қыздың екеуі 2-сыныпта, біреуі 9-сыныпта, бір ұл 4-сыныпта оқиды. Аудандық білім беру бөлімінің мәліметінше, мектептегі асхана қызметін «Абуев» жеке кәсіпкерлігі жүргізеді. Тексеру нәтижесі бойынша жауапты тұлғаларға қатысты шара қолданылатыны хабарланған.
