Биыл байқауға әлемнің әр түкпірінен он мыңға жуық адам қатысып, солардың ішінен тек 10 қатысушының ғана хаты әлемге танымал басылымда жариялану мүмкіндігіне ие болды,
Фариза өзінің ашық хатында қазақ қыздарының есімдеріне байланысты дәстүрлер тақырыбын қозғаған. Онда да өз шығармасында ол Ұлболсын деген қыз есімінің түп-төркінін түсіндіреді. Сөйтіп дүниеге ұл келуін күтіп, оны жасырмаған қазақ отбасында қыз баланың тағдыры қалай өрбитіні жайлы ой толғайды. Бұл ой оған үлкендердің әңгімелері мен достарының тәжірибесі, сондай-ақ әлеуметтік желілер мен медиадағы пікірталастардан кейін келген. Өз басынан мұндай жағдай өтпесе де, Фариза бұл мәселені жүрекпен қабылдап, ішкі толғанысын көркем әрі терең жеткізе білгені үшін қазылар алқасының назарын аударды.
Байқау шарты бойынша, қатысушылар ашық хат жанрында мақала жазуы тиіс болған. Бұл формат – нақты бір аудиторияға үндеу жолдай отырып, бүкіл қоғам үшін маңызды тақырыпты қозғауға мүмкіндік береді. Міндетті шарттардың бірі – хат тек ақпарат беріп қана қоймай, оқырманды әрекет етуге немесе ойлануға итермелеуі керек.
Айта кетейік, Фариза халықаралық деңгейдегі білім байқауларында бұған дейін де жетістіктерге жеткен. 2025 жылы Infomatrix Asia сайысында екінші орын иеленсе, Technovation Girls жобасында Қазақстан атынан жартылай финалист атанған.
Гуманитарлық бағыттағы жетістіктеріне қарамастан, Фариза болашағын ғылыммен байланыстырады, нақтырақ айтқанда – биомедициналық инженериямен.
"Мақала, эссе жазған маған ұнайды. Бұл – шынайы толғандырған тақырып туралы еркін ой айту мүмкіндігі. Бірақ болашақта мен ғылым арқылы нақты өзгеріс жасағым келеді", – дейді Фариза.
Бұған дейін Францияда өткен халықаралық физика олимпиадасында қазақ жастары бес медаль жеңіп алғанын жазғанбыз.