Былтыр желтоқсан айында жол апатына 9 бала ұшыраған. Оның біреуі көз жұмған. Түрлі жарақат алған сегіз баланың бесеуінің жағдайы ауыр деп бағаланған.
"Балаларға бүгінде бірнеше ота жасалды. Екеуі үйден оқып жатыр. Екеуіне де денсаулығына байланысты мүгедектік тағайындалған. Енді аяққа тұрып кету үшін ұзақ оңалту шаралары қажет. Негізгі біздің талап – салаға жауапты шенділер көмегін берсін", - деп КТК телеарнасы балалары үшін жүрегі жаралы аналардың сөзін келтіреді.
Қазір бұл оқиғаға қатысты көлік тізгіндеген спорт мектебі директорының орынбасарына қатысты сот отырысы жалғасып жатыр. Оған екі баппен айып тағылған.
"Оңалту болғанда, біздің басқарма тарапынан мұндай мәселе қаралмаған. Дегенмен басқа да мектептеріміз бар, облыстағы спортшылар қауымдастығы бар, соларға үндеу тастап, осындай жағдайда бәріміз қол ұшын берейік. Сонымен қатар қайырымдылық турнирін ұйымдастырып, түскен қаражатты, азды-көпті болса да балаларға жәрдем ретінде беру шаралары атқарылып жатыр". Ақтөбе облысы спорт басқармасының бөлім басшысы Айбат Ермекбаев
