Қадағалаушы орган таратқан ақпаратқа сүйенсек, Шымкент қаласының прокуратурасы балалардың сауықтыру лагерлерінің қызметінде балалардың өмірі мен денсаулығына әсер ететін бұзушылықтарды анықтады. Атап айтқанда:
- "Hawaii" лагері өртке қарсы дабыл жүйесімен жабдықталмаған және міндеттелген санитарлық-эпидемиологиялық қорытындысыз жұмыс істеген, ал 2023 жылы бұл лагерьге 478 баланы орналастырған;
- 220 балаға есептелген "Үш бұлақ" лагерінде 310 оқушы орналастырылған, тиісінше бір баланың ұйықтайтын орны 4 шаршы метрдің орнына 2,8 шаршы метрге дейін қысқарған.
"Лагерьлердің көптеген қызметкері еңбек шартынсыз жұмыс істеген, медициналық қызметтерді біліктілігі жоқ және медбике маманының сертификатынсыз қызмет көрсетіп жатыр".Шымкент қаласының прокуратурасы
Медициналық кабинеттердің өзі белгіленген талаптарға сәйкес келмейді, міндетті медициналық препараттар мен жабдықтар жоқ.
"Тексеру іс-шаралары жалғасуда, нәтижелері бойынша шаралар қабылданатын болады", – делінген Шымкент қаласының прокуратурасы таратқан хабарламада.