Салтанатты шараға Жамбыл облысы әкімінің орынбасары Қанатбек Мәдібек, Тараз қаласының әкімі Бақытжан Орынбеков, еңбек және білім саласының ардагерлері, қала тұрғындары қатысты.
Сурет: Тараз қаласы әкімдігінің баспасөз қызметі
Әуелі Қанатбек Қайшыбекұлы сөз алып, ақжарма тілегін білдірді.
"Бүгін Сіздер үшін ерекше қуанышты күн. Өйткені баршамыз Тараз қаласындағы "Ұлы дала" жаңа ықшамауданында 1200 орындық жаңа мектеп пайдалануға берілуіне куә болып отырмыз. Жаңа мектепте білім сапасы артып, балаларымыз жақсы оқып, ел сенімін ақтайды деп ойлаймын", – деген облыс әкімінің орынбасары мектеп ұжымына шығармашылық табыс тіледі.
Келесі кезекте еңбек ардагері Шарафи Қалдарбеков жиналған қауымға жылы лебізін арнап, білім саласының үздігі, зейнеткер Ережепбай Бекеевпен бірге жаңа мектеп ғимаратының лентасын қиды.
Сурет: Тараз қаласы әкімдігінің баспасөз қызметі
Бұдан кейін қонақтар мектептің ішін аралап, материалдық-техникалық базасымен танысты.
Құрылысын "Агроспецстрой" жауапкершілігі шектеулі серіктестігі жүргізген №64 білім ордасы "Ұлы дала" ықшамауданындағы алғашқы мемлекеттік мектеп. Бүгінде аталған ықшамауданда 25 мыңнан астам адам тұрмыс кешсе, оның 2314-і мектеп жасындағы балалар.
Білім ордасы лингафон кабинеттері, зертхана, 350 адамға арналған кең акт залы, оқу залы бар кітапхана мен 400 орындық асхана, шеберханамен толығымен жабдықталған. Сондай-ақ 56 оқу кабинеті интерактивті тақталармен қамтамасыз етілген.
Сурет: Тараз қаласы әкімдігінің баспасөз қызметі
Аталған ауданда жаңа білім ошағының ашылуы жергілікті тұрғындар үшін көптен күткен қуаныш болды.
Сурет: Тараз қаласы әкімдігінің баспасөз қызметі
Облыс әкімі Ербол Қарашөкеевтің қатысумен өткен кездесулерде де тұрғындар тарапынан осы мәселе жиі көтеріліп келді. Енді соның сәтін салып, жаңа мектеп есігін айқара ашып отыр. Мемлекет басшысының тапсырмаларын орындау мақсатында қазіргі уақытта аталған ықшамауданда 2024 жылы тапсырылуы жоспарланған 4400 оқушыға арналған тағы 3 мектептің құрылысы жүруде.
