Елордалық полицияға алтын бұйымдар сатумен айналысатын кәсіпкер арызбен жүгініп, алаяқтық әрекеттердің құрбаны болғанын хабарлаған.
Жәбірленушінің айтуынша, клиенттерінің бірі оның бутигінен 3 миллион теңгеге тауар алып, ақшасын төлемей, алдап кеткен.
Байқоңыр ауданы ПБ қызметкерлері жедел-іздестіру іс-шараларын жүргізу барысында алаяқтық жасады деген күдікпен 38 жастағы қала тұрғынын анықтады. Тергеу барысында анықталғандай, әйел жәбірленушіден бірнеше рет үлкен сомада алтын бұйымдар сатып алып жүрген.
Осылайша сатушының сеніміне кірген алаяқ кезекті саудасын жасауға келіп, тауарды қарызға алып кеткен. Қаскүнем ақшаны қысқа мерзімде әкеліп беремін деген уәде беріп, келесі күні әртүрлі сылтау айтып, уәдесін орындамай хабарсыз кеткен.
Алаяққа алданып қалғанын түсінген жәбірленуші полицияға жүгінген. Аталған фактіге қатысты сотқа дейінгі тергеу амалдары жүргізіліп жатыр. Әйелдің елорда аумағында жасалған осыған ұқсас басқа да қылмысқа қатысы бар-жоғы тексеріліп жатыр.