Журналистер министрден бүгін үкімет ғимаратына қандай көлікпен келгенін сұрады.
"Біз бұл сұраққа бірнеше мәрте жауап берген болатынбыз, дегенмен қайта бір айта кетейін – менің көлігім орталықтандырылған мемлекеттік органмен қамтамасыз етілген, Kia көлігі", — деді ол.
Сондай-ақ ол көліктің қайда құрастырылғанын білмейтінін атап өтті, себебі оған таңдау берілмеген.
"Машинаны біз таңдамаймыз. Шынымды айтсам, сіз бұл сұрақты маған төртінші немесе бесінші мәрте қойып тұрсыз. Сіздің автомобильдерге деген қызығушылығыңызға таңқалдым. Маған қандай көлік беріледі, сол көлікпен келемін", — деп атап өтті Шарлапаев.
Сонымен қатар, БАҚ өкілдері мемлекеттік қызметкер ретінде министр отандық өндірісті ілгерілетуге міндетті екенін атап өтті.
"Сөзіңіздің жаны бар. Мен елімізде құрастырылған көлік беруін сұрап көрейін. Бұған дейінгі жұмысымда Elantra көлігімен жүргенмін. Қызмет орным ауысты да, берген көлікпен жүре бердім. Көлік мәселесін көтермеген болатынмын. Енді қайтадан елде құрастырылған көлікке отырамын. Бұдан ешқандай мәселе көріп отырған жоқпын. Бұл жерде маған қандай көлік беретініне байланысты. Не берсе, сонымен жүремін", — деді Қанат Шарлапаев.
Бұған дейін Қазақстандағы жылжымалы құрам паркінің жартысынан астамы ескіргені хабарланған болатын.
