2024 жылдың қорытындысы бойынша ведомствоның аумақтық басқармалары судың санитарлық-химиялық және микробиологиялық көрсеткіштеріне зерттеулер жүргізді.
"Орталықтандырылған сумен жабдықтауда санитарлық-химиялық көрсеткіштерге 4137 сынама алынды, оның 257-сі сәйкес келмейді, бұл жалпы көрсеткіштің 6,2% құрайды. Сәйкессіздіктер Ақжайық, Бөрлі, Казталов, Қаратөбе, Сырым, Тасқала, Теректі, Шыңғырлау аудандарында және Бәйтерек ауданында анықталды. Микробиологиялық көрсеткіштерге облыс бойынша барлығы 4337 сынама зерттелді, оның 135-і сәйкес келмейді, бұл 3,1%-ды құрайды. Сәйкессіздіктер облыстың Бөкей ордасынан басқа барлық аудандарында анықталды", — деп түсіндірді спикер.
Ол сондай-ақ орталықтандырылмаған сумен жабдықтауда да осындай көрсеткіштерге сынамалар алынғанын толықтырды. 360 сынаманың нәтижелері бойынша санитарлық-химиялық көрсеткіштерге 45-і сәйкес келмейді. Тізімге Ақжайық, Казталов, Қаратөбе, Сырым, Тасқала және Теректі сияқты аудандар енді.
Санитарлық-микробиологиялық көрсеткіштерге 425 сынама зерттелді, оның 41-і сәйкес келмейді. Сәйкессіздіктер Жаңақала, Казталов, Қаратөбе, Сырым, Тасқала, Теректі аудандарында және Бәйтерек ауданында анықталды.
Бұған дейін Сырдария өзеніндегі дамбалар нығайтылғандығы хабарланған болатын.