Осыған байланысты Жамбыл облысы полиция департаментінің қызметкерлері аймақтағы тұрғындарды жаңа қауіптерден сақтау мақсатында профилактикалық жұмыстарды күшейтті.
Полицейлер мектептерге, жоғары оқу орындарына, ұйымдарға және тұрғын үй кешендеріне барып, ақпараттық парақшалар таратып, алаяқтардың құрбаны болмаудың жолдарын түсіндіруде.
"Бұрын қылмыскерлер банктер мен полиция атынан хабарласатын болса, қазір олар жақын туыстарыңыздың даусын көшіріп, шұғыл түрде ақша аударуды сұрауы мүмкін. Сонымен қатар жасанды интеллект көмегімен сіздің атыңыздан жалған видео жасап, шантажбен айналысады. Бұл технологиялар алаяқтықты шынайы етіп көрсететіндіктен, аса сақ болу қажет", – деп атап өтті Жамбыл облысы ПД киберқылмыспен күрес басқармасының бастығы Уәлихан Ағыбаев.
Жасанды интеллект арқылы жасалатын алаяқтықтың құрбаны болмау үшін не істеу керек?
- Жақындарыңызға қайта қоңырау шалыңыз – егер көмек сұраған күмәнді дауыс хабарламасы келсе, оның расында жақыныңыз екенін анықтап алыңыз.
- Алаяқтар дауысты ұқсатып жасап алады.
- Аудио немесе видео хабарламалар арқылы ақша жібермеңіз – ол танысыңыздан келгендей көрінуі мүмкін.
- Алдымен басқа байланыс тәсілімен нақтылап алыңыз.
- Мессенджерлердегі шұғыл өтініштерге сенбеңіз – әсіресе, жағдайдың шұғыл екенін айтып, сендіруге тырысқан сәтте.
- Алаяқтар аккаунттарды бұзып, достарыңыздың атынан хат жаза алады.
- Күдікті сілтемелер мен файлдарды ашпаңыз – алаяқтар ЖИ арқылы жалған банк сайттарын жасап, сол арқылы сіздің жеке деректеріңізді алуы мүмкін.
- Ақпаратты тексеріңіз – егер сізге күмән тудыратын видео немесе дауыс хабарламасы келсе, оны ресми дереккөздерден тексеруге тырысыңыз.
- Екі факторлы аутентификацияны орнатыңыз – бұл әлеуметтік желілер мен мессенджердегі аккаунттарыңызды бұзылудан қорғайды.
- "Жеңіл табыс" туралы ұсыныстардан сақ болыңыз – алаяқтар ЖИ арқылы автоматтандырылған хат-хабар таратып, инвестициялық схемалар, ұтыстар мен қаржылық айла-шарғылар ұсынуы мүмкін.
Полиция жасанды интеллект технологияларын қолданатын алаяқтарға тап болсаңыз, дереу "102" нөміріне хабарласуға шақырады.