Журналистер Қазақстан мұнай өндіру бойынша жоспарды жүйелі түрде асыра орындап келе жатқанын атап өтіп, осыған байланысты міндеттемелер қалай орындалатынын және елдің келісімнен шығуы мүмкін бе деген сұрақ қойды.
"Нақтылап өткім келеді: біз ОПЕК ұйымының мүшесі емеспіз, біз ОПЕК+ келісіміне қатысушы елміз. ОПЕК+ аясында өз міндеттемелерімізді барынша орындауға тырысамыз. Алайда биыл Теңіз кен орнын кеңейту жобасы енгізілгендіктен, қазіргі кезеңде бұл міндеттемелерді әрқашан орындай алмай жатырмыз", - деп жауап берді Үкімет басшысы.
Бектеновтің айтуынша, бұл мәселе Өнімді бөлу туралы келісімде (ӨБК) толық жазылған.
"Біз бұл туралы әрқашан ОПЕК+ әріптестерімізге айтып келеміз: ПБР іске қосылған кезде, біз болжам бойынша өз міндеттемелерімізден асып кетеміз. Бұрынғы жылдары, керісінше, біз белгіленген квотаны орындай алмадық. Яғни, бұл мәселе ОПЕК+ кездесулерінде алдын ала талқыланып жүр. Біз, мысалы, Теңіз жобасындағы серіктестерімізден өндірісті қысқартуды талап ете алмаймыз. Олар болашақ кеңейту жобасына 49 миллиард доллар инвестиция құйды. Әрине, олар мұнай өндіру көлемін арттырып, инвестицияларын қайтарып, пайда табуды көздейді. Сондықтан бұл – өте нәзік мәселе. Бірақ дәл қазіргі уақытта біз ОПЕК+ келісімінен шығу нұсқасын қарастырып отырған жоқпыз. Бұл келісім пайдалы деп есептейміз, ол белгілі бір деңгейде мұнай нарығындағы тұрақтылыққа ықпал етеді. Сол себепті бұл мәселе күн тәртібінде жоқ. Біз міндеттемелерімізді барынша, бірақ, әрине, ұлттық мүдделерді ескере отырып орындауға тырысамыз", - деді Премьер-министр.