Ақмола облысы полиция департаментінің хабарлауынша, 14 шілдеде Көкшетау полиция басқармасына жедел жәрдем станциясының фельдшері кәсіпорындардың бірінде болған жазатайым оқиға туралы хабарлаған. Алдын ала мәлімет бойынша, 54 жастағы ер адам бағанды бояп жатқан кезде астындағы саты сынып, ол биіктен құлап кеткен. Басынан алған ауыр жарақаты салдарынан жұмысшы оқиға орнында қайтыс болған.
"Аталған факті бойынша ҚР Қылмыстық кодексінің 156-бабы 3-бөлігі — "Еңбекті қорғау қағидаларын бұзу, абайсызда адам өліміне әкеп соққан" бойынша сотқа дейінгі тергеу басталды. Сот-медициналық сараптама тағайындалды. Сонымен қатар мемлекеттік еңбек инспекторы тарапынан тексеру жүргізіліп жатыр", - деп нақтылады полиция.
Полицейлер мұндай қайғылы оқиғалардың алдын алуға болатынын атап өтіп, еңбек қауіпсіздігі талаптарын қатаң сақтау қажет екенін ескертті. Олар жұмыс берушілерге келесі шараларды ұсынып отыр:
- Әсіресе, биіктікте жұмыс істейтін қызметкерлерді жарамды, қауіпсіз және сертификатталған құрал-жабдықтармен қамтамасыз ету;
- Еңбек қауіпсіздігі бойынша үнемі нұсқамалар өткізіп, талаптардың нақты орындалуын бақылау;
- Жабдықтардың, құрал-саймандардың және қорғаныс құралдарының жағдайын тұрақты түрде тексеріп отыру.