Ұлттық банктің мәліметінше, 2025 жылғы маусымда жылдық инфляция 11,8%-ға дейін өсті. Маусым айында ел бойынша айлық инфляция 0,8%-ды құрады. Ең жоғары көрсеткіш Ақмола және Абай облыстарында (әрқайсысында 1,3%) тіркелді.
Жалпы, жылдық инфляция 18 өңірде үдеп, бір өңірде өзгеріссіз қалды, бір өңірде баяулады. Ол 7 облыс бойынша республикалық деңгейден жоғары болды. Ең жоғары инфляция Алматы қаласында (13,8%) тіркелді.
Ұлттық банк азық-түлік және азық-түлікке жатпайтын тауарларға, сондай-ақ ақылы қызметтерге жыл сайынғы баға өсімі тиісінше 10,6%-ға (мамырда – 9,6%), 9,4%-ға (мамырда – 9%) және 16,1%-ға (мамырда – 16,0%) дейін жеделдегенін еске салды.
Бірқатар өңірлерде азық-түлік бағасы республикалық орташа деңгейден жоғары көтерілді. Ең айқын өсім Ақмола (12,5%), Қарағанды (12%), Батыс Қазақстан, Солтүстік Қазақстан және Шығыс Қазақстан облыстарында (әрқайсысында 11,9%) болды.
Азық-түлік емес тауарлар бағасының айтарлықтай өсуі Түркістан (12,5%), Абай (11,4%), Атырау (11%) облыстарында, сондай-ақ Ұлытау облысында (11,3%) байқалды.
Ақылы қызметтердің бағасы Алматы (23,4%) мен Қарағанды облысында (18,1%) ең жоғары өсті.
Маусым айында кейбір азық-түлік тауарларының бағасының көтерілуіне не себеп болғанын бұған дейін хабарлаған болатынбыз.