Өңірлік әкімдіктің мәліметінше, төтенше жағдай кезінде кәсіпорынның төрт қызметкері зардап шеккен. Жәбірленушілерге көмек көрсету үшін Қазақстан Республикасының бас реаниматологы мен күйік медицинасы бойынша жетекші мамандар жұмылдырылған.
"Зардап шеккендерге термиялық күйік диагнозы қойылды. Екі адам жансақтау бөліміне жатқызылса, қалған екеуі жарақат бөліміне орналастырылды", - делінген ресми хабарламада.
Қазіргі таңда зардап шеккен жұмысшылардың жағдайы тұрақты, оларға қажетті медициналық көмек толық көлемде көрсетіліп жатыр. Жағдай облыс басшылығының бақылауында.
"Өңірлік мемлекеттік еңбек инспекциясы департаментінің мәліметінше, кәсіпорында от қолданылатын жұмыстар тиісті рұқсат құжаттарынсыз жүргізілген. Апатқа жабық кеңістікте жұмыс істеу барысында еңбек қауіпсіздігі талаптарының сақталмауы себеп болуы мүмкін. Бұл оқиға бойынша арнайы комиссия құрылып, тергеу басталды", - деді әкімдік өкілдері.
Аталған оқиға бойынша ҚР Қылмыстық кодексінің 156-бабы — "Еңбекті қорғау қағидаларын бұзу" бойынша қылмыстық іс қозғалды.