Енді меншік иелері бірлестігі (ОСИ) мен пәтер иелері кооперативінің (КСК) төрағалары және басқарушы компания басшылары өз міндеттерін орындамағаны үшін 50-ден 200 айлық есептік көрсеткішке (АЕК) дейін айыппұл арқалауы мүмкін. Бұған дейін олар тек ескерту алатын, деп еске салады Zakon.kz.
Қазақстанның тұрғын үй заңнамасын бұзуға байланысты жауапкершілік ӘҚБтК-нің 320-бабымен реттеледі. Бірақ бұл бап бұрын тек құрылыс компанияларына ғана айыппұл қарастырса, КСК мен ОСИ төрағалары түрлі заңбұзушылықтары үшін тек ескерту алатын. Ал кооперативтердің қалыпты жұмыс істеуіне кедергі келтіретін кейбір елеулі бұзушылықтарға мүлде жаза қарастырылмаған болатын.
Бұл тәртіп енді өзгереді. Мемлекет басшысы жаңа тұрғын үй реформасы аясында әзірленген “Тұрғын үй-коммуналдық шаруашылық мәселелері бойынша ҚР ӘҚБтК-не өзгерістер мен толықтырулар енгізу туралы” заңға қол қойды. Құжат жарияланды және 2025 жылғы 15 қыркүйекте күшіне енеді.
Бұрын қалай еді?
Кондоминиум нысанына басқару жүргізетін орган банкте ағымдағы немесе жинақ шот ашу мерзімін бұзса, сондай-ақ ортақ мүлікті басқару және күтіп ұстау бойынша ай сайынғы және жылдық есептерді кеш тапсырса, тек ескерту берілетін (ӘҚБтК 320-баптың 4 және 5-бөлімдері бойынша).
Енді не өзгереді?
320-бапқа бірқатар маңызды өзгерістер енгізілді. Енді көпқабатты тұрғын үйдегі ОСИ төрағасы, КСК төрағасы немесе басқарушы компания басшысы келесі жағдайлар үшін айыппұл төлейді:
- Кондоминиум нысанын басқаруға арналған ағымдағы немесе күрделі жөндеуге қаражат жинақтауға арналған жинақ шотын уақтылы ашпағаны үшін – 50 АЕК (320-бап, 4-бөлік);
- Ай сайынғы және жылдық есепті кеш тапсырғаны үшін – 50 АЕК (320-бап, 5-бөлік);
- Басқару нысаны өзгерген кезде құжаттарды, техникалық құрал-жабдықтарды қабылдау-тапсыру актісін уақытында бермегені немесе одан бас тартқаны үшін – жеке тұлғаларға 50 АЕК, заңды тұлғаларға 100 АЕК айыппұл (320-бап, 8-бөлік);
- Бір жыл ішінде бұл құқықбұзушылықтар қайталанса, айыппұл көлемі екі есе өседі (320-бап, 10-бөлік).
Бұл айыппұлдар ағымдағы немесе жинақ шоттарындағы тұрғындардың қаражаты есебінен төленбейді. Яғни, оларды басқарушы тұлғалар өз қалтасынан өтеуге тиіс.